ក្រសួងមហាផ្ទៃ (MoI) មានតួនាទីជាអង្គភាពប្រតិបត្តិការគម្រោង ដឹកនាំ និងតម្រង់ទិសលើការងារគ្រប់គ្រងទាំងមូល។ ការិយាល័យសម្របសម្រួលគម្រោង (PCO) មានតួនាទីជាអង្គភាពសម្របសម្រួលគម្រោងថ្នាក់ជាតិ ជាមួយគ្រប់ស្ថាប័នអនុវត្តគម្រោងទាំងអស់ (IAs)។ ដើម្បីធានាឱ្យគម្រោងនេះអនុវត្តបានល្អ PCO ត្រូវបានបង្កើតឡើងនៅក្រោមក្រសួងមហាផ្ទៃ និងសម្របសម្រួលដោយ ឯកឧត្តម ងី ច័ន្រ្ទផល ប្រធានសម្របសម្រួលគម្រោង និងដឹកនាំដោយ ឯកឧត្តម ប្រាក់ សំអឿន នាយកគម្រោង លោក ហេង សុផាត ប្រធានគ្រប់គ្រងគម្រោងលាភទទួលខុសត្រូវត្រួតពិនិត្យ និងគ្រប់គ្រងគម្រោងប្រចាំថ្ងៃ។

ក្រៅពីអនុវត្តតាមអនុសាសន៍របស់គណៈកម្មាធិការតម្រង់ទិសគម្រោង និង​ការិយាល័យសម្របសម្រួល គម្រោង ដំណើរការអនុវត្តគម្រោងត្រូវគោរពតាមគោលការណ៍របស់រាជរដ្ឋបាលស្តីពីវិមជ្ឈការ និងសហវិមជ្ឈការទៅដល់ថ្នាក់ក្រោមជាតិ ដែលបានកំណត់តួនាទី ភារកិច្ចសំខាន់ៗក្នុងការធ្វើផែនការ និងការអនុវត្តរួមមាន សកម្មភាព កិច្ចលទ្ធកម្ម ដែលគាំទ្រការអនុវត្តដោយគណៈកម្មការគ្រប់គ្រង និងទីប្រឹក្សាជាតិអនុវត្ត។ ផ្អែកតាមបទ​ពិសោធន៍ពីការអនុវត្តគម្រោងសាកល្បង និងការធ្វើបច្ចុប្បន្នភាពស្របតាមស្ថានភាពស្ថាប័ននាពេលបច្ចុប្បន្ន រចនាសម្ព័ន្ធគ្រប់គ្រងរដ្ឋបាលគម្រោងត្រូវបានរៀបចំឡើងដោយឆ្លុះបញ្ចាំងពីសមាសភាគគម្រោងទាំងនៅជនបទ និងទីក្រុង និងតម្រូវការផ្នែកអនុវត្ត។

គណៈកម្មការគ្រប់គ្រងគម្រោងមានសមាសភាពចំនួន២៧រូប ដែលត្រូវបានតែងតាំងមកពីក្រសួងមហាផ្ទៃ ក្រសួងកសិកម្ម រុក្ខាប្រមាញ់ និងនេសាទ ក្រសួងសេដ្ឋកិច្ច និងហិរញ្ញវត្ថុ សាលារាជធានីភ្នំពេញ និងរដ្ឋបាលខេត្តសៀមរាប។

ទីប្រឹក្សាជាតិគាំទ្រការអនុវត្តគម្រោងមានសមាសភាពចំនួន១០៨នាក់ ដើម្បីផ្តល់ជំនួយបច្ចេកទេសដល់ការិយាល័យសម្របសម្រួលគម្រោង (PCO) គម្រោងលាភសាលារាជធានីភ្នំពេញ (PPCH-SMT) គម្រោងលាភខេត្តសៀមរាប (SR-SMT) និងក្រសួងកសិកម្ម រុក្ខាប្រមាញ់ និងនេសាទ (MAFF) ក្នុងការគ្រប់គ្រង និងអនុវត្តគម្រោងប្រកបដោយប្រសិទ្ធភាព។