រាជធានីភ្នំពេញ ថ្ងៃព្រហស្បតិ៍ ៦រោជ ខែភទ្របទ ឆ្នាំកុរ ឯកស័ក ព.ស.​២៥៦៣​ ត្រូវនឹងថ្ងៃទី១៩ ខែកញ្ញា ឆ្នាំ២០១៩​ នៅសណ្ឋាគារកាំបូឌីយ៉ាណា​ ការិយាល័យសម្របសម្រួលគម្រោងលាភ បាន​រៀប​ចំ​កិច្ច​ប្រជុំ​គណៈគ្រប់គ្រងគម្រោងលាភ ដើម្បីពិនិត្យមើល​វឌ្ឍនភាព​​​ការងារ បញ្ហាប្រឈម និងលើកទិសដៅអនុវត្តបន្ត។ លោក ហេង សុផាត ប្រធានគម្រោងលាភថ្នាក់ជាតិ បានដឹកនាំកិច្ចប្រជុំក្នុងនាម ឯកឧត្តម ប្រាក់ សំអឿន អគ្គនាយកនៃអគ្គនាយកដ្ឋានរដ្ឋបាលនៃក្រសួងមហាផ្ទៃ និងជានាយកគម្រោងលាភដែលបានអញ្ជើញបិទអង្គប្រជុំនៅពេលរសៀល។ អញ្ជើញចូលរួមកិច្ចប្រជុំផងដែរមាន ឯកឧត្តម ហ៊ួត ហៃ អភិបាលរងនៃគណៈអភិបាលរាជធានីភ្នំពេញ និងជា​ប្រធាន​គម្រោង​លាភរាជធានីភ្នំពេញ ឯកឧត្តម លី សំរិទ្ធ អភិបាលរងនៃគណៈអភិបាលខេត្តសៀមរាប និងប្រធានគម្រោងលាភខេត្តសៀមរាប និងបណ្ឌិត ម៉ៅ មិនា ប្រធាន​នាយកដ្ឋាន​អប់រំកសិកម្មនៃក្រសួងកសិកម្ម រុក្ខាប្រមាញ់ និងនេសាទ និង​មន្រ្តី ប្រឹក្សាគម្រោងលាភចំនួន៥១នាក់ ក្នុងនោះស្រី១២នាក់មកពីក្រសួង​មហាផ្ទៃ ក្រសួងកសិកម្ម រុក្ខាប្រមាញ់ និងនេសាទ រដ្ឋបាល​សាលារាជធានី​ភ្នំពេញ​ រដ្ឋបាលសាលាខេត្តសៀមរាប​។

មានប្រសាសន៍ក្នុងពិធីបើកអង្គប្រជុំ លោក ហេង សុផាត បានគូសបញ្ជាក់ថា ឆ្នាំ២០១៩នេះ ជាឆ្នាំទី២នៃដំណើរការអនុវត្តគម្រោងលាភ ដែលជម្រុញឱ្យក្រុមការងារទាំងអស់របស់គម្រោង ពន្លឿនការងារអនុវត្តផែនការសកម្មភាព និងធ្វើការងារយ៉ាងសកម្មបំផុត ដើម្បីដោះស្រាយបញ្ហាប្រឈមមួយចំនួន ដែលអាចធ្វើឱ្យរាំងស្ទះដល់ដំណើរការអនុវត្តគម្រោង និងធានាឱ្យការអនុវត្តគម្រោងអាចសម្រេចបានជោគជ័យ។ សកម្មភាព​អាទិភាពមួយចំនួនដែលបានដោះស្រាយកន្លងមករួមមាន កិច្ចលទ្ធកម្មផ្គត់ផ្គង់ឧបករណ៍ និងសម្ភារៈបម្រើ​ឱ្យ​ការងារ​​អនុវត្តគម្រោងមាន តុ កៅអី កុំព្យូទ័រ និងឧបករណ៍ ផ្សេងៗទៀតពាក់ព័ន្ធការកសាងហេដ្ឋារចនាសម្ព័ន្ធ​នៅតាមមូលដ្ឋានគោលដៅ ការបង្កើត​ក្រុមជួយខ្លួនឯង និងការអភិវឌ្ឍន៍ជំនាញសម្រាប់ប្រជាពល​​​រដ្ឋក្រីក្រនៅតាម ភូមិ ឃុំ/សង្កាត់​គោលដៅ​របស់គម្រោង​។

កិច្ចប្រជុំបានផ្តោតលើរបៀបវារៈសំខាន់ៗចំនួន៥រួមមាន៖(១)វឌ្ឍនភាព បញ្ហាប្រឈម និងទិសដៅ អនុវត្តបន្តរបស់ការិយាល័យសម្របសម្រួលគម្រោង (២)​វឌ្ឍនភាពសកម្មភាពសមាសភាគ១របស់រដ្ឋបាលខេត្ត​​សៀមរាប (៣)វឌ្ឍនភាពសមាសភាគ២របស់រដ្ឋបាលរាជធានីភ្នំពេញ (៤)វឌ្ឍនភាព​របស់គម្រោងលាភ ក្រសួងកសិកម្ម រុក្ខាប្រមាញ់ និងនេសាទ (៥)កិច្ចពិភាក្សាដែលបានផ្តោតសំខាន់លើការគ្រប់គ្រងហិរញ្ញវត្ថុ ការអនុវត្ត​ និងការគ្រប់គ្រងកិច្ចសន្យាអនុគម្រោងហេដ្ឋារចនាសម្ព័ន្ធសហគមន៍ និងប្រព័ន្ធតាមដាន ត្រួតពិនិត្យនិងវាយតម្លៃ។

ក្នុងបទបង្ហាញស្តីពីវឌ្ឍនភាពការងារអនុវត្តគម្រោងលាភខេត្តសៀមរាប ឯកឧត្តម លី សំរិទ្ធ បានជំរាបជូន​អង្គប្រជុំស្តីថា គម្រោងបានកំពុងដើរលើផ្លូវត្រូវស្របតាមគោលដៅគម្រោង ជាក់ស្តែងក្នុងឆ្នាំ២០១៩នេះ គម្រោងបានបង្កើតក្រុមជួយខ្លួនឯង សកម្មភាពលើកកម្ពស់ការអភិវឌ្ឍន៍ជំនាញ និងកែលម្អហេដ្ឋារចនាសម្ព័ន្ធខ្នាតតូចនៅមូលដ្ឋានគោលដៅគម្រោង។ ចំពោះសមិទ្ធផលពាក់ព័ន្ធសកម្មភាពជួយខ្លួនឯង ឯកឧត្តម លីសំរិទ្ធ បានឱ្យដឹងថាគម្រោងសម្រេចបានប្រហែល៣៣.៦% និងមានថវិកាប្រហែល៤០% ធៀបនឹង​ផែនការ។ ចំពោះ​វឌ្ឍន​​​ភាពផែនការអភិវឌ្ឍន៍ជំនាញវិញ ឯកឧត្តម សំរិទ្ធ បានបង្ហាញពីសុទិដ្ឋិនិយមនៃដំណើរការ​រៀបចំវគ្គបណ្តុះ​បណ្តាល​សម្រាប់យុវជនដែលត្រូវបានជ្រើសរើស និងកំពុងផ្សព្វផ្សាយជ្រើរើសឱ្យចូលរៀនវគ្ក​សិក្សារយៈពេលខ្លី និងរយៈពេលវែងនៅតាមវិទ្យាស្ថានដៃគូមួយចំនួននៅខេត្តសៀមរាប។ ជាក់ស្តែងរហូតមក​ដល់ពេលនេះ មាន​សិស្ស​ចំ​​នួន១៥នាក់បានកំពុងសិក្សាលើជំនាញ អគ្គីសនី ម៉ាស៊ីនត្រជាក់ និងកាន់ដែរ និងនៅឆមាស​បន្ទាប់​ក្រុម​ការងារកំពុងដំណើរការចចារ និងចុះកិច្ចសន្យាជាមួយវិទ្យាស្ថានចំនួន០៤រួមមាន វិទ្យា​ស្ថានអង្ករ​ វិទ្យា​ស្ថានតេជោ អង្កការអេប៉ក់ និងសមាគមជីវិត និងក្តីសង្ឍឹម។ ដោយឡែក​ការអនុវត្តន៍​អនុ​គម្រោង​ហេដ្ឋរចនា​សម្ព័ន្ធវិញ គម្រោងលាភខេត្តសៀមរាបបានរៀបចំកិច្ចលទ្ឋកម្ម និងចុះកិច្ច​សន្យាអនុ​គម្រោង​ហេដ្ឋារចនា​សម្ព័ន្ឋ​បានចំនួន១៣ អនុគម្រោង និងកិច្ចសន្យាចំនួន១៣ ដែលបានកំពុងអនុវត្តក្នុងនោះមានកិច្ច​សន្យាចំនួន០៥ អនុវត្ត​ចប់១០០% និង៨កិច្ចសន្យាទៀតបានអនុវត្តប្រហែល ៤០% ហើយ។

សម្រាប់សមាសភាគទី២ លោក នៅ វ៉ាត តំណាង ឯកឧត្តម ហួត ហៃ អភិបាលរងនៃគណៈ​អភិបាល​​រាជធានីភ្នំពេញ និងជាប្រធានគម្រោងលាភរាជធានីភ្នំពេញ បានជំរាប​ជូនអង្គប្រជុំ​ពីវឌ្ឍនភាពនៃ​ការអភិវឌ្ឍន៍ជំនាញ និងលើកកម្ពស់សេវាមូលដ្ឋាន និងហេដ្ឋា​រចនាសម្ព័ន្ធសហគមន៍ក្រីក្រនៅក្នុងទីក្រុង ព្រមទាំង​បញ្ហាប្រឈម និងទិសដៅអនុវត្តបន្ត។ លោកនៅ វ៉ាត បានឱ្យដឹងថាគម្រោងលាភសាលាក្រុងភ្នំពេញ​បានអនុវត្តន៍​ផែនការ​អភិវឌ្ឍន៍​ជំនាញ​តាមរយៈសកម្មភាពបង្កើនការយល់​ដឹងបន្ថែមពីជំនាញចាំបាច់ ដំណើរការ​ជ្រើសរើស​សិ​ក្ខាកាម ការងារតម្រង់​ទិស និងការបណ្តុះបណ្តាលជំនាញ​ទន់ និងការធ្វើផែនការកម្មវិធីផ្តល់សក្ខីបត្រ​បន្ទាប់​ពីបញ្ចប់​ការសិក្សាជំនាញ សកម្មភាពគាំទ្រសិក្ខាកាមក្នុងការស្វែងរកការងារធ្វើ និងចុះកិច្ចព្រមព្រៀង​ជាមួយ​អង្គភាព​ផ្តល់សេវា​បណ្តុះ​បណ្តាល។ល។​ លោក វ៉ាត បានឱ្យដឹងទៀតថា បច្ចុប្បន្នគម្រោងលាភរាជធានីភ្នំពេញ​បានទទួលពាក្យស្នើសុំ​ចំនួន​១៤១រូប (ស្រី៦៩រូប) ​មកពី​គ្រួសារមានប័ណ្ណក្រ១និងក្រ២ និងគ្មានប័ណ្ណក្រីក្រ។ ក្នុងជំហានទី១ គម្រោង​​​បានសម្រេចជ្រើសរើស​សិក្ខាកាម​ចំនួន១៥នាក់ឱ្យចូលរៀនតាមជំនាញដែល​ពូកគាត់​​ពេញចិត្ត​ក្នុងនោះមាន​ជំនាញសាឡន និងអាពាហ៍ពិពាហ៍ ជួសជុលម៉ូតូ និងរថយន្ត ចំអិនអាហារនិងឆុងកាហ្វេ អគ្គីសនី ជួសជុល​ទូរស័ព្ទ និងវិទ្យាសាស្រ្តអុបទិចនៅតាម​វិទ្យាស្ថានដៃគូនៅរាជធានិភ្នំពេញ។ ពាក់ព័ន្ធសកម្មភាពលើកកម្ពស់​សេវាមូលដ្ឋាន និងហេដ្ឋារចនសម្ព័ន្ធនៅក្នុងទីក្រុងវិញ លោក វ៉ាត បានឱ្យដឹងថា អនុគម្រោង​ផ្លូវ​បេតុង​​អាមេ​ចំនួន៥បាននឹងកំពុងអនុវត្តនៅឆ្នាំ២០១៩នេះ នៅសង្កាត់ចំនួន៧នៅរាជធានីភ្នំពេញរួមមាន ដង្កោរ គោក​រការ ចោមចៅ២ ព្រៃវេង ច្បារអំពៅ២ ត្រពាំងក្រសាំ និងបឹងកក១។ សម្រាប់ឆ្នាំ២០២០ គម្រោង​សាលា​រាជ​ធានី​​បាននឹងកំពុងបន្តចាត់អាទិភាពសម្រាប់អនុគម្រោងហេដ្ឋារចនាសម្ព័ន្ធ ដោយបានសិក្សាលម្អិត​លើផល​ប៉ះ​​ពាល់បរិស្ថាន និងលក្ខណៈបច្ចេកទេសឱ្យបានត្រឹមត្រូវមុនពេលដំណើរការអនុវត្ត។

លោកស្រី ញ៉ក់ តំណាងក្រសួងកសិកម្ម​ បានចាប់ផ្តើមបទបង្ហាញដែលជាបទបង្ហាញចុងក្រោយ​នៃកិច្ចប្រជុំនេះ ដោយបានលើកយកពី​សមិទ្ធផល​ដែល​ក្រសួង​កសិកម្ម រុក្ខាប្រមាញ់ និងនេសាទ​សម្រេចបាន​ក្រោម​​គម្រោង​លាភ ដោយបានបញ្ជាក់ថាផែនការ​បង្កើន និងពង្រឹងសមត្ថភាពជាសកម្មភាពអាទិភាពដែលក្រុម​​ការងារ​​គម្រោង​លាភ​នៃក្រសួងកសិកម្ម ​បាន​អនុវត្តសំដៅគាំទ្រក្រុមជួយខ្លួនឯងក្នុងការកសាងសមត្ថភាព តាម​រយៈ​ការបើក​វគ្គបណ្តុះបណ្តាល​បច្ចេកទេស​ចំនួន៣លើកស្តីពី ការចិញ្ចឹមមាន់ស្រុក បច្ចេក​ទេស​​​សួន​​ដំណាំ​លក្ខណៈ​​គ្រួសារ និងផលិតកម្មដំណាំ​ស្រូវ​ដល់​ក្រុម​ពេទ្យសត្វឃុំ (CAHEWS) ចំនួន២៥នាក់ ក្នុងនោះ​ស្រី្ត​ចំនួន​៦នាក់។ រៀបចំប្រមូលចងក្រង​ក្រុមអ្នក​ផលិត​​ចំនួន២៧២នាក់ ក្នុងនោះមានស្រ្តីចំនួន២៥៥នាក់ ដែល​ជាកសិករ ​និង​មានការចាប់អារម្មណ៍​ចូលរួមក្នុង​ក្រុម​ដាំបន្លែ ក្រុមចិញ្ចឹមជ្រូក និងក្រុមចិញ្ចឹមមាន់។ លោកស្រី​បានបន្តទៀតថា នៅឆ្នាំ២០២០ ក្រុម​ការងារនឹង​ធ្វើការ​ជ្រើសរើសកសិករគំរូ ដែលទទួលបានជោគជ័យក្នុង​ការចិញ្ចឹមសត្វ និង​ដាំបន្លែ និងណែនាំដល់ក្រុមដទៃទៀតឱ្យរៀនសូត្រ និងទទួលយកបទពិសោធន៍ដើម្បីបន្តអនុវត្តសកម្មភាពកសិកម្មរបស់ខ្លួន ព្រមទាំង​ស្វែងរក​ទីផ្សារ​​សម្រាល់ផលិតផលកសិកម្ម ដើម្បីជួយពួកគាត់ឱ្យ​ទទួល​បានប្រាក់​ចំណូលដើម្បីផ្គត់ផ្គង់គ្រួសារឱ្យ​មាន​ជីវភាព​ប្រសើរ​ឡើង។

ក្នុងពេលបិទអង្គប្រជុំ ឯកឧត្តម ប្រាក់ សំអឿន បានថ្លែងអំណរគុណដល់ភ្នាក់ងារ​អនុវត្ត​គម្រោង​ទាំងអស់ដែលបានខិតខំបំពេញការងាររបស់ខ្លួនទទួលបានជោគជ័យ។ ជាក់ស្តែងនៅក្នុងត្រីមាសទី៣ ឆ្នាំ២០១៩នេះ គម្រោងលាភទាំងថ្នាក់ជាតិ ថ្នាក់ក្រោមជាតិ សម្រេចបានវឌ្ឍនភាពល្អ គិតជាភាគរយ​ប្រហែល​៤៨%​ស្ទើរគ្រប់ផ្នែកទាំងអស់របស់គម្រោង។ ពាក់ព័ន្ធសកម្មភាពអភិវឌ្ឍន៍ជំនាញ និងសេវាសង្គម និង​ហេដ្ឋា​រចនា​សម្ព័ន្ធ ឯកឧត្តម បានលើកទឹកចិត្តឱ្យភ្នាក់ងារថ្នាក់ក្រោមជាតិជាអ្នកដើតួរនាទីសំខាន់ និងដឹកនាំ​ការងារ​នេះ ដោយ​មាន​ការចូលរួមពីអជ្ញារធរមូលដ្ឋានផង ជាពិសេសមេឃុំ និងចៅហ្វាយស្រុក ពីព្រោះពួកគាត់​បាន​កំពុង​​ធ្វើ​ការងារ​​ជាមួយប្រជាជននៅមូលដ្ឋានដោយផ្ទាល់ ឧទាហរណ៍ការចូលរួមក្នុងសកម្មភាពបង្កើត​ក្រុមជួយ​ខ្លួ​នឯង​ និងហេដ្ឋារចនាសម្ព័ន្ធជាដើម​។ល។

ពាក់ព័ន្ធសុវត្ថភាពសង្គម ឯកឧត្តមប្រធានអង្គប្រជុំ​បានសំណូមពរ​ឱ្យ​អង្គភាព​​ទាំងអស់របស់គម្រោង​​​​លាភ ពង្រឹងការយកចិត្ត​ទុក​ដាក់​​ពីសុវត្ថិភាពសង្គម និងបរិស្ថានមុនពេល និង​ក្រោយពេលកសាងហេដ្ឋារចនាសម្ព័ន្ធជនបទ ធ្វើយ៉ាងណា​ខិតខំពន្យល់ឱ្យប្រជាជនបានយល់​ដឹងពីផលប៉ះ​ពាល់និងផលប្រយោជន៍ផ្នែកសេដ្ឋកិច្ចនៅក្នុងមូលដ្ឋាន​ដែលគាត់​កំពុងរស់នៅ។ ដើម្បីប្រសិទ្ធភាពការងារ​​ និង​លទ្ធភាពដោះ​ស្រាយបញ្ហា បានទាន់ពេលវេលា ឯកឧត្តម បាន​សំណូមពរ​ឱ្យមានកិច្ចប្រជុំនៅថ្នាក់ក្រោមជាតិ ជាពិសេសការជួបជាមួយក្រុមការងារសម្របសម្រួលឃុំ និងស្រុក ​ឱ្យបានទៀតទាត់រៀងរាល់មួយខែម្តង ដើម្បី​ប្រមូលរាល់បញ្ហាទាំងអស់មកដោះស្រាយ។ មុននឹងបញ្ចប់កិច្ចប្រជុំនេះដែរ ឯកឧត្តម បានជូនពរ​ដល់​ក្រុម​ការងារទាំងអស់សម្រេចកិច្ចការបានជោគជ័យបន្ថែមទៀត និងសូមធ្វើដំណើរដោយសុវត្ថភាពសម្រាប់​ការវិល​ត្រឡប់ទៅកាន់​មូលដ្ឋាន​វិញ។ កិច្ចប្រជុំបានបញ្ចប់ក្រោមបរិយាកាសស្និតស្នាល និងរាក់ទាក់បំផុត។