ព្រឹកថ្ងៃព្រហស្បតិ៍ទី ០៥ ខែធ្នូ ឆ្នាំ២០១៩ នៅការិយាល័យសម្របសម្រួលគម្រោងលើកកម្ពស់ជីវភាព ប្រជាជនក្រីក្រ មានបើកកិច្ចប្រជុំបូកសរុបលទ្ធផលបេសកកម្មលើកទី៦ របស់ធនាគារពិភពលោក ដើម្បីគាំទ្រការអនុវត្តគម្រោងលើកកម្ពស់ជីវភាពប្រជាជនក្រីក្រ(លាភ) ក្រោមអធិបតីភាពដ៏ខ្ពង់ខ្ពស់ ឯកឧត្ដម ងី ច័ន្ទ្រផល រដ្ឋលេខាធិការក្រសួងមហាផ្ទៃ និងជាប្រធានសម្របសម្រួលគម្រោងលាភ និងមានការអញ្ជើញចូលរួមរបស់ ឯកឧត្តម ប្រាក់ សំអឿន អគ្គនាយកនៃអគ្គនាយកដ្ឋានរដ្ឋបាល និងជានាយកគម្រោងលាភនៃក្រសួងមហាផ្ទៃ លោក ហេង សុផាត ប្រធានគ្រប់គ្រងគម្រោងលាភថ្នាក់ជាតិ លោក Erik C. Johnson ប្រធានក្រុមការងារគម្រោងលាភ រួមជាមួយមន្ត្រីបច្ចេកទេសរបស់ធនាគារពិភពលោក បណ្ឌិត ម៉ៅ មីនា ប្រធានគ្រប់គ្រងគម្រោងលាភ ក្រសួងកសិកម្ម រុក្ខាប្រមាញ់ និងនេសាទ លោក លី សំរឹទ្ធ អភិបាលរងខេត្តសៀមរាប ទទួលបន្ទុកគម្រោងលាភ តំណាងអភិបាលរងរាជធានីភ្នំពេញ និងជានាយកគម្រោងលាភសាលារាជធានីភ្នំពេញ និងមន្រ្តី ទីប្រឹក្សាគម្រោងចំនួន ៤៨នាក់។

កិច្ចប្រជុំមានគោលបំណងបូកសរុបលទ្ធផលដែលក្រុមការងារបេសកកម្មលើកទី៦ បានរកឃើញក្នុងពេលចុះជួបជាមួយភ្នាក់ងារអនុវត្តគម្រោង និងជួបជាមួយអ្នកទទួលផលទាំងនៅរាជធានីភ្នំពេញ និង​នៅខេត្តសៀមរាប ជាពិសេសលទ្ធផលដែលសម្រេចបានក្រោមសមាសភាគទាំងបីរួមមាន៖​ ហេដ្ឋារចនាសម្ព័ន្ធខ្នាតតូច ការអភិវឌ្ឍជំនាញ ការបង្កើត និងការគ្រប់គ្រងក្រុមសន្សំ។ កិច្ចប្រជុំក៏បានពិភាក្សាផងដែរពីបញ្ហាប្រឈម និងឱកាសសម្រាប់ការងារពង្រឹងយន្នការអនុវត្តគម្រោង ធ្វើយ៉ាងណាឱ្យការងារអនុវត្តប្រព្រឹត្តទៅបានរលូន និងសម្រេចបានតាមផែនការដែលបានគ្រោងទុក។

មានប្រសាសន៍ក្នុងកិច្ចប្រជុំ ឯកឧត្តម ងី ច័ន្រ្ទផល បានសង្កត់ធ្ងន់លើយន្នការបើកចំហរទីផ្សារការងារសម្រាប់យុវជន ឬអ្នកទទួលផលគម្រោងមកពីគ្រួសារក្រីក្រ ដែលមាននៅក្នុងសមាសភាគទី១​ របស់គម្រោងលាភ។ សមាសភាគនេះបានផ្តោតសំខាន់លើសកម្មភាពបណ្តុះបណ្តាលជំនាញដល់ប្រជាជនក្រីក្រ និងងាយរងគ្រោះ ដែលជាគោលដៅចុងក្រោយ ធ្វើយ៉ាងណាជួយឱ្យពួកគាត់ទទួលបានការងារ​ធ្វើក្រោយពី​បាន​បញ្ចប់​វគ្គបណ្តុះបណ្តាលរួចមក។ ដើម្បីសម្រេចបានគោលដៅនេះ ឯកឧត្តម បានស្នើរឱ្យក្រុមការងារគម្រោង​ពិនិត្យមើល​លក្ខ័ណ្ឌ​ចាំបាច់មួយចំនួន ជាពិសេសកម្មវិធីបណ្តុះបណ្តាលជំនាញដែលមានទីផ្សារការងារ​សម្រាប់​ពួកគេ។ ជាមួយគ្នានេះដែរ ក្នុងក្របខ័ណ្ឌ​អនុវត្តគម្រោង ឯកឧត្តម បានជំរាបអង្គប្រជុំពីកម្មវិធីវាយ​តម្លៃការអនុវត្តគម្រោង​នៅពាក់​កណ្តាលអណត្តិ ដែលគ្រោងនឹងធ្វើឡើងនៅខែសីហា ឆ្នាំ២០២០ នាពេល​ខាងមុខ។ ក្រុមការងារទាំងអស់​តម្រូវឱ្យពិនិត្យឱ្យបានគ្រប់ជ្រុងជ្រោយ​នូវផ្នែកពាក់ព័ន្ធ​នានា ដោយឈរ​លើ​បទ​ពិសោធន៍ ការប្រឈមដែល​យើងបានជួបប្រទះ និងពិភាក្សាលទ្ធផលសម្រេចបាននៅតាមមូលដ្ឋានគោលដៅ​ទាំងពីររបស់​គម្រោង(ភ្នំពេញ និងសៀមរាប) ដោយជម្រុញឱ្យមានការសម្រេចចិត្តធ្វើ សកម្មភាព ផ្អែកលើបទពិសោធន៍ និង​ដាក់​ចេញវិធានការចាំបាច់ ក៏ដូចជាផលប៉ះពាល់សំខាន់ក្រោមកិច្ចអន្តរាគមន៍របស់គម្រោង។ ឯកឧត្តម​ បាន​បន្ថែមទៀត​ថា ការវាយ​តម្លៃ​ពាក់​កណ្តាល​អណត្តិនេះ មានចរិកជាយុទ្ធសាស្រ្ត ជាយន្នការរៀបចំបង្កើតថ្មី ជាជាង​គ្រាន់តែធ្វើ​ឡើង​ដើម្បី​តែតាមដាន ឬអង្កេតពី​វឌ្ឍនភាពគម្រោង ពោលគឺជាយន្នការមានគោលដៅកែលម្អប្រសិទ្ធ​ភាពការងារ​ឱ្យបាន​ប្រសើរ​ជាង​មុន។ ឯកឧត្តម បានសំណូមពរឱ្យថ្នាក់ដឹកនាំ និងក្រុមការងារពិភាក្សា​ឱ្យបាន​ស៊ីជម្រៅ និង​សិក្សា​ឱ្យបានច្បាស់​លាស់​ពីតម្រូវការទីផ្សារការងារនាពេលបច្ចុប្បន្ន​ ដោយពិចារណារកំណត់គោល​ដៅស្ថាប័ន​បណ្តុះ​​បណ្តាល​ឱ្យ​បាន​យ៉ាងហោច​ណាស់ចំនួន៥បន្ថែមទៀតនៅឆ្នាំខាងមុខ។

នៅក្នុងរបាយការណ៍បេសកកម្មលើកទី៦របស់ធនាគារពិភពលោកបានឱ្យដឹងថា នៅឆ្នាំ២០១៩នេះ គម្រោងសម្រេចបានលទ្ធផលគួរឱ្យគត់សម្គាល់ច្រើនបើប្រៀបទៅនឹងឆ្នាំ២០១៨។ ជាមួយគ្នានេះដែរ ដើម្បី​ត្រៀមលក្ខណៈសម្រាប់បេសកកម្មត្រួតពិនិត្យ និងវាយតម្លៃពាក់​កណ្តាលអណត្តិ ដែលគ្រោងធ្វើ​ឡើងនៅកញ្ញា ឆ្នាំ​២០២០ កិច្ចប្រជុំបានសំណូមពរឱ្យក្រុមការងារពន្លឿនកិច្ចការដែលនៅសេសសល់ ដូចជា​ការរៀបចំចងក្រងទិន្នន័យ​គម្រោង ការពិចារណារបង្កើតក្រុមជួយខ្លួនឯងក្នុងចំណោម​ប្រជាជនងាយ​រងគ្រោះ ដែលមិនមានប័ណ្ណក្រីក្រ និងកម្មវិធីបណ្តុះបណ្តាលកសិកម្មជាដើម ។ល។