នៅព្រឹកថ្ងៃអង្គារ ៧រោច ខែបុស្ស ឆ្នាំជូត ទោស័ក ព.ស. ២៥៦៤ ត្រូវនឹង ថ្ងៃទី ០៥ ខែមករា ឆ្នាំ២០២១ ។

ឯកឧត្តម ប្រាក់ សំអឿន អគ្គនាយក នៃអគ្គនាយកដ្ឋានរដ្ឋបាល និងជានាយកគម្រោងលាភក្រសួងមហាផ្ទៃ បានអនុញ្ញាត្តអោយក្រុមការងារនៃក្រុមហ៊ុនផលិតវីដេអូរខ្លី ស្តីពីសមិទ្ធិផលរបស់គម្រោងលាភ នៅការិយាល័យសម្របសម្រួលគម្រោង ក្រសួងមហាផ្ទៃ។ ក្នុងបទសម្ភាសន៍ ឯកឧត្តម បានមានប្រសាសន៍ថា ក្នុងការអនុវត្តគម្រោងរាជរដ្ឋាភិបាលតាមរយៈក្រសួងសេដ្ឋកិច្ច ​និងហិរញ្ញវត្ថុបានទទួលប្រាក់កម្ចីហិរញ្ញប្បទាន ពីធនាគារពិភពលោកចំនួន ២០,១៧លានដុល្លាសហរដ្ឋអាមេរិក និងថវិកាបដិភាគពីរដ្ឋាភិបាលចំនួន២លានដុល្លា។ យើងបង្កើតគម្រោងនេះពីដើមមកគឺជួយគ្រួសារក្រីក្រ និងជនងាយរងគ្រោះ ពេលនោះយើងមិនបានគិតពី ការឆ្លងរាលដាលនៃជំងឺកូវីឌ១៩ ប៉ុន្តែក្នុងកំឡុងកូវីឌ ផលប៉ះពាល់ចំបងគឺប្រជាពលរដ្ឋ​ក្រីក្រនោះឯងដែលគាត់គ្មានមុខរបរអ្វីដែលអាចរកចំណូលបានខ្ពស់ទេ អញ្ជឹងក្នុងបរិបទកូវីឌគម្រោងលាភមានប្រ​យោជន៌ដល់ពួកគាត់។​ យើងបានចូលរួមចំណែក ក្នុងការដោះស្រាយផលប៉ះពាល់ នៃការឆ្លងរាលដាលនៃជំងឺកូវីឌ១៩ ទាំងផ្នែកសេដ្ឋ​កិច្ច​និងសង្គមតាមរយៈការបង្កើនទុន និងសមត្ថ​ភាពដល់ក្រុមផលិត និងក្រុមជួយខ្លួនឯង។